Nagtipon ang pila ka grupo sang mga kooperatiba kag korporasyon sang modernized jeepneys sa atubang sang Bacolod City Government Center bilang protesta sa proposal sang Senado nga ipostpone ang Public Utility Vehicle Modernization Program.
Ala-1:00 sang udto, gikan sa nagkalainlain nga routa nagpatigayon sang ‘unity walk’ ang mga modernized jeepneys kun sa diin sila ang nagtingob sa atubang sang BCGC.
Sa interview sang Bombo Radyo Bacolod kay Miller Amacan, Yard’s Man Supervisor sang Cebu People’s Multipurpose Cooperative, kalakip sa mga nakigbahin ang management personnel sang mga kooperatiba kag korporasyon, drivers, operators, konduktor, inspector, dispatcher, controler, yard’s man kag iban pa agud ipakita sa gobyerno nga madamo ang mga nakabenepisyo sa PUV Modernization Program.
Sa mga tarpaulin nga nabutang sa atubang sang mga modernized jeepney units, nakabutang ang ”we support public transport modernization program” kag ”solusyon indi suspensyon”.
Nagalaom si Amacan nga sila ang pamatian bangod sila ang mga nagsunod sa programa sang gobyerno.
Para sa iya, indi manami nga sila nga mga nagasunod amo pa ang suspendihon kag madulaan sang palangabuhian.
Dugang pa sini nga madamo sang nagapasalamat sa serbisyo sang modernized jeepneys bangod protektado ang mga pasahero sa ulan kag init.
Suno diri, madamo sang maapektuhan inkaso nga untaton ang PUV Modernization Program ilabi na karun nga 50 porsyento na ang nagsulod sa consolidation process.
Aminado si Amacan nga maapektuhan gid ang ila nga kita bangod sa pila ka oras nga pag-untat sang byahe, apang ginpasalig naman sang ila management nga makabatun sila gihapon sang nagakaigo nga sweldo kag overtime pay.
Apisar sini, gin-athag ni Amacan nga agud indi maapektuhan ang commuters, 20 porsyento sang mga modernized jeepneys ang padayun nga ginpabyahe.
