Ginpatigayon ang Public Hearing ang Department of Energy para sa Visayas Power Crisis sa isa ka hotel sa Lacson Street, Bacolod City.
Ini ang ginpangunahan sang mga District kag Partylist Representatives upod sa nagkalainlain nga ahensya kag opisina nga may kaangtanan sa energy sector, partikular na ang Department of Energy, National Grid Corporation of the Philippines (NGCP), National Electrification Administration (NEA), Energy Regulatory Commission (ERC), power generators, distribution utilities, kag mga stakeholders.
Sa opening statement ni Bacolod City Lone District Representative kag House Deputy Speaker Alfredo “Albee” Benitez, ang importansya sang energy sector ang indi lang tubtob sa kuryente sa panimalay, bangod ini ang may dako nga papel sa padayun nga pag-uswag sang isa ka lugar.
Suno sa kongresista ang kuryente ang liyabi sa pag-umwad sang negosyo, expansion sang ekonomiya, pagpabilin sang operasyon sang mga ospital, kag epektibo nga pagtudlo sa mga eskwelahan.
Ginapakamaayo niya ang pag-ugyon sa ginpatawag nga inquiry in aid of legislation, kag indi lamang pagpangita sang problema ang ila tinutuyo, kundi ang makapangita sang solusyon.
Luwas sa mga short-term solutions, importante nga may maplastar nga medium kag long-term solutions para malikawan ang kaangay nga problema sa palaabuton.
Dapat man dumdumon suno kay Benitez ang pagpatuman sang Republic Act No. 9136 ukon Electric Power Industry Reform Act of 2001, nga mas nakilala bilang EPIRA Law.
Panugyan sini nga dapat balikan kun ano na ang nahimo nga reporma sa power sector, kun sa diin gina-encourage ang private sector cooperation para sa kompetisyon.
Suno kay Benitez, ang Visayas ang nagaserbe nga importer sang power supply bangod ang mayorya sa mga power generators ang yara sa Luzon kag Mindanao.
Dugang pa niya indi lamang tuhoy sa kun pila ang magenerate nga power supply, kundi dapat ini ang responsive sa panginahanglanon sang komunidad.
Sa ulihi sini nga statement, ginpahayag sang kongresista nga “dapat may liwanag sa Visayas” nga dapat bastante, segurado, masaligan, kag barato.
