Nagpanugyan ang Negros Occidental Police Provincial Office (NOCPPO) sa mga kapulisan sa probinsya nga sundon ang Standard Operating Procedure (SOP) sa pagpatigayon sang checkpoint.
Ini ang kasunod sang dismissal order nga ginpapanaog sang National Police Commission batok sa anom ka mga miyembro sang Moises Padilla Municipal Police Station bangud sa kaso nga ginpasaka ni Mayor Ella Celestina Garcia-Yulo sang gindakop ini sa checkpoint sa Crossing Magallon sang December 19, 2017 kun sa diin iya ginpanindugan nga gintamnan ini sang shabu, granada kag mga armas sa sulod sang iya salakyan.
Ang anom ka mga kapulisan ang ginkasuhan sa ginapahayag illegal checkpoint kag unlawful arrest nga bayolasyon sa Napolcom Circular 2016-002 kag 2013 PNP Police Operational Procedure.
Sa interview sang Bombo Radyo Bacolod kay Police Lt. Abegael Donasco, ginpahayag sini nga sa tion nga magpatigayon sang checkpoints, ginalantaw gid ang seguridad kag ginasiguro nga wala sang may malapas nga kinamatarong sang mga pumuluyo nga ginapatigayunan sang checkpoints.
Suno kay Donasco, ang mga kapulisan ang mahimo lang makacheck sa salakyan sa kun ano lang ang makita kag ginadumilian ang iban nga pagcheck sa salakyan magluwas nalang kun may ginserbe nga search warrant ang mga kapulisan, kasubong man kun may yara sang marka ang salakyan kag may nakita nga makatilingala sa salakyan nga nagtulod sa mga ini nga tsekyaron.
Ini ang ginatawag nga plain view doctrine kun sa diin ginalantaw lang sang mga pulis ang sa sulod kag sa gwa sang salakyan paagi sa makita sang naked eye.
Ginpahayag man ni Donasco nga kinahanglan man nga ipakita sang mga pumuluyo ang driver’s license kasubong man ang mga dokyumento sang salakyan sa checkpoints.
Wala man sang dapat nga dala nga bisan ano nga kontrabando agud nga wala sang rason nga dakpon sa checkpoints.
Suno sa tagpamaba mahimo nga ireklamo sang mga pumuluyo ang kapulisan nga nagpatigayon sang checkpoints kun nakita sang mga ini nga ginlapas ang ila kinamatarong kag wala nagsunod sa SOP.
