Magahulat lang ang Sangguniang Panlungsod sang Bacolod kun ano ang plano sang Albee administration sa proposed Bacolod MassKara Coliseum nga nagabalor sang P800 million.
Kasunod sang iya proklamasyon bilang masunod nga alkalde sang Bacolod, ginpahayag ni Mayor-elect Albee Benitez nga nagaplano ini nga irepurpose ang pondo para sa construction sang coliseum para sa mas barato kag mas simple nga convention center ukon trade center.
Nakigsapol si Benitez sa mga opisyales sang City Engineer’s Office kag Development Bank of the Philippines sa construction site sa Barangay Alijis kag iya ginpahayag nga kun irepurpose ang coliseum, maalign sang local government ang pondo para sa redisigning kag rebuilding sang mga merkado sa ciudad.
Ang Bacolod MassKara Coliseum ang isa sa mga priority projects sang city government nga ginpondohan sang P1.7 billion nga loan sang city government sa Development Bank of the Philippines.
Sa interview sang Bombo Radyo kay Bacolod City Vice Mayor El Cid Familiaran, ang executive branch ang magadesisyon kun dayunon ukon ligwaton ang proyekto kag magahulat lang ang Sangguniang Panlungsod kun may kinahanglan nga aprubahan ukon igaratify nga kontrata.
Bilang legislative body suno kay Familiaran, nagahatag lang ini sang approval sa ginahingyo sang executive branch.
Sa karon, wala pa sang ideya ang bise alkalde kun pila na ka porsyento ang nasuguran sa coliseum.
