Ginkanselar sang Commission on Elections ang special elections nga natalana sa Disyembre 9 para sa ikatatlo nga distrito sang Negros Oriental, nga natalana kuntani nga magatumod kun sin-o ang magabulos kay expelled congressman Arnolfo “Arnie” Teves Jr.
Ini matapos gin-adoptar sang poll body ang rekomendasyon sang law department sini kag sang isa ka House resolution nga may tinutuyo nga ipostpone ang pagpiniliay.
Ang House Resolution 154 ang gin-adoptar sang Kamara sang Nobyembre 7, isa ka adlaw matapos nagfile sang certificate of candidacy si Pryde Henry Teves para sa iya pwesto sang iya utod.
Si Arnie Teves ang ginpahalin sa Kamara bangud sa indi maayo nga pamatasan kag padayon nga pag-absent sa House proceedings apisar nga expired na nag iya travel authority.
Siya ang nagapangatubang man sang mga kaso nga murder, frustrated murder kag attempted murder may kaangtanan sa pagpatay kay Negros Oriental Governor Roel Degamo.
Lunsay si Arnie kag Henry ang ginkilala bilang mga terorista sang Anti-Terrorism Council may kaangtanan sa pagpamatay kag harassments sa Negros Oriental.
Samtang, ginpahayag naman ni Pryde Henry nga magaapelar ini sang iya designation bilang isa ka terorista.
