May gintukod na nga Special Investigation Task Group nga maga-imbestigar sa shooting incident sa Sitio Ipil-Ipil, brgy Mambulac, ciudad sang Silay, Negros Occidental kaina sang aga.
Ang mga biktima ang mga miyembro sang Team Ugyon nga nagamonitor sa ginapahayag lapnagon nga vote buying kag yara nagabantay sa pribado nga balay nga nagaserbe headquarters sang Team Asenso.
Ang mga napatay ang ginkilala nga sanday Albert Salimbot, yara sa legal nga edad, residente sang Hda. Macamig Pulo, Brgy E. Lopez kag Ronnie Piedad, 45 anyos, residente sang Zone 7, Purok Ipil-Ipil, Brgy Mambulac samtang ang mga pilason naman ang ginkilala nga sanday Ruel Espinosa, 42, anyos, Purok Highway, Zone 15, Talisay City; Ric Ortillano, 46 anyos, residente sang Hofileña Subd, Brgy Mambulac; Wilfredo Cuello, 46 anyos, residente sang PLDT Baybay, Brgy Mambulac; Jason Belleza, legal ang edad, residente ang Yolanda Housing, Brgy E. Lopez; Joey Pomares, residente sang Brgy Mambulac; Glenn Gutierrez, 49 anyos, residente sang Cabay Bodegam Brgy Guinhalaran, kag may isa pa nga wala nakuhaan sang identity.
Suno kay Police Regional Office – Negros Island Region Director Police Brig Gen Arnold Thomas Ibay, ginakabig pa lamang nga suspected election related incident ang natabo kag indi pagid madeklarar bangod kinahanglan pa nga matumod ang motibo.
Ginatudlo nga suspect sa krimen si Punong Brgy Arnie Benedicto sang Brgy Lantad, Silay City.
Sa imporasyon siya ang nagsulod sa balay kag paggwa sini iya ginpangluthang ang mga biktima kag nagpalagyo samtang may duha pa ka nagbulig sa iya nga nagpabilin sa balay.
Si Benedicto ang nagsungka naman sa Negros Occidental Police Provincial Office sang hapon.
Samtang tubtob sa karun indi masulod sang kapulisan ang balay, kun sa diin ginapatihan nga yara gihapon ang duha ka dugang nga suspect bangod wala pa sang search warrant.
Apang nagmando na si Police Lt Col Mark Anthony Darroca, hepe sang Silay City Police Station nga gwardiyahan ang balay agud indi makapalagyo ang mga suspect.
May mga miyembro naman sang Team Asenso nga nakita nga nagdul-ong sang pagkaon sa mga yara sa sulod sang balay.
