Magasugod na subong nga adlaw ang activation sang Special Investigation Task Group (SITG) sang Philippine National Police (PNP) sa pagpadasig sa pagsolbar sang pagpangluthang patay sa Barangay Kagawad sa banwa sang Murcia sang Enero 26.
Sa interview sang Bombo Radyo kay Negros Occidental Police Provincial Office (NOCPPO) spokesperson Police Captain Judesses Catalogo, ginpatukod ang SITG bangud ang biktima ang isa ka elected official, gani automatic nga ginarekomendar ang pag-activate sang task group agud mas matutokan kag direkta ang direksyon sang imbestigasyon.
Suno kay Catalogo, ang SITG ang mahimo nga maghatag sang weekly update nahanungod sa progreso sang imbestigasyon agud matumod ang identity sang suspect.
Dugang pa, nagpatigayon man sang security survey inspection kag threat assessment sa tanan nga mga elected officials sa probinsya halin sa mga barangay officials tubtob sa mga mayor kag iban pa nga local executives.
Suno diri, wala man sang may nareport sa mga kapulisan nga may ara sang pagpamahog sa mga elected officials.
