May natukod na nga Special Investigation Team nga magatutok sa kaso sang chop-chop nga parte sang tawo nga ginbilin sa gwa sang National Bureau of Investigation (NBI) – Bacolod office.
Sa interview sang Bombo Radyo Bacolod kay Police Captain Glenn Montaño, station commander sa Bacolod Police Station 2, ang special investigation team ang ginapangunahan ni Bacolod City Police Office (BCPO) Director Police Col. Noel Aliño.
Kaupod man diri ang Deputy Director for Operation, Intelligence kag Investigation kasubong man siya, bilang officer in charge sa Bacolod Police Station 2, nga may Area of Responsibility sa NBI-Bacolod office.
Suno diri, sila ang nagpadulong sa NBI-Bacolod office agud makahinun-anon sa mga personnel nga yara sa talatapan, antes, mismo kag pagkatapos makit-an ang utod nga nawala nga tiil, nawala nga kamot kag pares sang dulunggan sa kilid sang service vehicle nga nakapark sa gwa sang ahensya.
Apisar nga ginpahayag na nga ginpatay ang CCTV camera sang NBI-Bacolod sang gab-i antes nasapwan ang sako nga may unod nga parte sang lawas, ginpakamaayo gihapon ni Montaño nga magpadala sang request agud matsekyar ang CCTV footage.
Magluwas diri, nagpadala man sila sang request nga malantaw ang CCTV footage gikan sa katupad sang talatapan, nga Office of the Provincial Agriculture kag Office of the Provincial Veterinarian.
Nagalaom si Montaño nga apisar sa kilid lamang ang malab-ot sang mga CCTV, ini ang nakacapture sa kun sin-o man nga nagbilin sang parte sang lawas nga may kaupod pa nga sulat nga “William De Arca protector ni Hanz Lopez ang druglord”.
Sa paghinun-anon kay NBI Special Agent De Arca, may-ara naman ini sang mga pangalan sang ginbuyagyag nga mahimo nila matutukan sa imbestigasyon.
Suno kay Montaño, si De Arca ang ulihi nga naka-aresto sang dako nga balor sang shabu sang 2022, apang sang damlag lamang ang ila nga focus ang nakasentro sa anti-illegal gambling operations, partikular na sa small town lottery (STL) kag e-sabong.
Nag-offer naman ang BCPO, sa paghatag sang proteksyon kay De Arca.
