Ginahibalo pa sang Special Joint Task Force Negros kun may yara sang contact sa New People’s Army ang mastermind sa Degamo assassination.
Ini kasunod sang pagkalakip sang isa ka anay miyembro sang NPA sa mga suspetsado nga nag-assassinate kag nagpatay kay Negros Oriental Governor Roel Degamo kag walo ka iban pa.
Sa interview sang Bombo Radyo kay Major Cenon Pancito III, spokesperson sang Joint Task Force Negros, suno sa rebelasyon sang mga suspetsado nga nagkaladakpan, nagpakilala bilang anay miyembro sang New People’s Army si Arnel Libradilla.
Siya ang napatay matapos ginaalegar nagbato sa mga pulis kag suldado nga nagpatigayon sang hot pursuit operations sa Barangay Cansumalig, Bayawan City, Negros Oriental sang Marso 4 sang gab-i.
Suno kay Pancito, naclaim na sang pamilya sini ang iya bangkay sang Marso 11.
Suno sa iya, ini ang nagapakita lamang nga mga warfighters ang ginakuha sang mastermind bangud ang mga suspetsado ang mga anay miyembro sang Philippine Army, ex-marine kag anay NPA.
Sa karun ila pa ginahibalo kun may yara sang contact ang mastermind sa New People’s Army.
Suno diri, ila ginalantaw ang tanan nga anggulo sa imbestigasyon kag ila pa ginavalidate ang mga impormasyon nga ila nagakabaton.
Sa karon, anom na ka mga suspetsado sa Pamplona massacre ang natumod – lima ang priso kag isa ang patay.
