Indi pa sigurado sang spokesperson sang Special Joint Task Force-Negros kun kabahin sang napulo nga direkta nga nagsulod sa balay kag nagpatay kay Negros Oriental Governor Roel Degamo ang apat nga nagsungka sa mga otoridad kahapon.
Sa kumpirmasyon ni Justice Secretary Boying Remulla, halos tanan nga may kaangtanan sa Degamo assassination ang yara na sa kustodiya sang mga otoridad.
Sa interview sang Bombo Radyo kay Major Cenon Pancito III, wala pa sang official announcement kun nakumpleto na ang napulo ka mga perpetrators bangud mahimo nga ang apat ang kabahin lamang sang mga nagplano sa himuon nga krimen.
Suno kay Pancito, nagabutang sila sa karun sang special consideration sa pagpangita sang mga direct participants sa pagpatay sa gobernador kag walo ka iban pa.
Wala man nagakatapos ang mandato sang Special Joint Task Force-Negros sa pagpangita kag pagpasungka sang suspects bangud dapat man sang mga ini siguraduhon ang seguridad sang mga witnesses, pamilya kasubong man ang mga pumuluyo sang Negros Oriental agud nga matapna na ang kalakasan nga nagakatabo sa probinsya.
Suno pa diri, ang mga checkpoints ang nagapabilin agud magsecure sa lugar kag ang level sang kahangawa sang mga pumuluyo sang Negros Oriental ang nagapabilin.
Ginpahayag man sini nga ang pagsungka sang mga suspek ang bunga na sang effort nga ginahimo sang gobyerno kag nagahatag sang pressure nga magsungka na.
Wala man nagakadula ang kahadlok apang nakita na sang mga ini nga nagabalik na amat-amat ang normalcy sa probinsya.
Ginpahayag man sang spokesperson sang Special Joint Task Force-Negros nga ginapakamaayo man sang mga pumuluyo sa Negros Oriental nga mau presensya sang mga militar bangud nagnubo ang ila nga crime rate.
