Igapadala sa Bureau of Animal Industry ang nakuha nga sample gikan sa duha ka baboy sa Barangay Taculing nga nagpositibo sa African Swine Fever nga sa karun amo ang una nga kaso sang ASF sa probinsya sang Negros Occidental.
Sa interview sang Bombo Radyo kay Engr. Jose Albert Barrogo, Regional Director sang Department of Agriculture-Western Visayas, nagpadulong ini sa siyudad sang Bacolod dala ang polymerase chain reaction (PCR) machine.
Duha pa ka beses nga gintest ang mga baboy apang magkaangay ang resulta nga positibo ang mga ini sa ASF.
Suno diri, magakoordinar ini sa Provincial Government sang Negros Occidental agud makaplano sa pag-atubang sang probinsya sa problema sa ASF.
Ang mga baboy ang nagikan sa siyudad sang Bago, ang lugar nga ginkuhaan sang mga miyembro sang Sangguniang Kabataan sang Barangay Taculing, Bacolod City nga ila proyekto agud nga sila ang may inugbayad sa tuition fee.
Rekomendasyon ni Barrogo nga kuhaan sang sample ang mga baboy sa Bago City agud mahatagan sang gilayon nga tikang nga makontrolar ang paglapta sang nasambit nga balatian.
Igabyahe pa padulong sa Manila ang mga sample agud makuha ang kompirmasyon gikan sa Bureau of Animal Industry.
Dugang pa niya, sa anom ka probinsya sa Western Visayas, apat diri ang may yara sang positibo nga kaso sang ASF nga amo ang probinsya sang Capiz, Iloilo, Aklan kag Guimaras, samtang yara naman sa green zone ang Antique kag Negros Occidental.
Mensahe ni Barrogo, wala sang vaccine sa ASF kag sa karun wala sang may mahimo ang mga hog raisers kundi idipose na gid lamang ang mga baboy nga may ASF nga suno diri, kun ini indi mahatagan sang tikang, dako ang mangin halit sang African Swine Fever sa hog industry.
