Gin-athag sang spokesperson ni Bacolod City Mayor Alfredo “Albee” Benitez nga personal nga kwarta sang alkalde ang gingamit sa trip sang kapin sa 450 ka mag officials sang ciudad sa isla sang Boracay.
Sa interview sang Bombo Radyo Bacolod kay Atty Caesar Distrito, gin-imbita ni Benitez ang team Asenso nga ginalakipan sang mga konsehal, Brgy Officials, SK chairmans kag Brgy secretary kag treasurers, samtang wala naman nag-upod ang mga Punong Barangay.
Suno diri, sang Biyernes sila naglakat padulong sa Boracay kag magabalik subong nga adlaw.
Pahayag ni Distrito, ang paglakat nila ang kabahin sang political exercise agud magsturyahanay para sa plano sang grupo sa ginapaabot nga 2025 midterm elections.
Dugang pa sini, mismo ang alkalde ang naghambal nga kun siya ang magdaog dapat nga magdaog man ang iya kapartido.
Paathag ni Distrito, ang gasto sa byahe, plete, hotel kag pagkaon sang tanan nga imbitado ang naggikan sa personal nga kwarta sang alkalde kag wala sang may gintandog nga kwarta sang ciudad ukon sang gobyerno man.
Nagpasalig man ini nga wala sang trabaho nga nahalitan sa mga brgy bangod nagpabilin sa ciudad sang mga Punong Barangay para magtuman sang ila responsibilidad.
