Nagpaathag ang tagpamaba sa Land Transportation Franchising and Regulatory Board (LTFRB) Region 6 nga indi bangod sa ginahulat nga sabat sang Korte Suprema sa request para sa Temporary Restraining Order (TRO) ang rasun nga ginpahanugutan pa nga makabyahe ang mga unconsolidated traditional jeepneys.
Madumduman nga una nga ginpahayag ni Bacolod City Vice Mayor El Cid Familiaran nga makabyahe pa ang mga traditional jeepneys nga wala nakapaconsolidate samtang ginahulat ang sabat sa resolusyon nga ginpadala sang transport group sa Korte Suprema.
Sa interview sang Bombo Radyo Bacolod kay Atty Salvador Altura, nagapati ini nga may naghutik sa bise alkalde natuhoy diri, gani ini ang nakapagwa sang pahayag.
Gindumdom ni Altura nga sa mga transport group nga nakapadulong sa ila opisina, si Lilian Sembrano, secretary general sa isa ka faction sang Bacolod Alliance for Commuters Operators and Drivers, Inc. (BACOD) lamang ang nagaduso nga palawigon ang pagbyahe sang unconsolidated traditional jeepneys tubtob nga makapagwa na sang sabat ang Korte Suprema.
Paathag sang abogado nga indi matuod nga ang sabat sa TRO ang ila ginahulat bangod inkaso nga wala sang maggwa nga sabat ang Supreme Court, magakahulugan man nga magapadayun lamang sa pagbyahe ang mga traditional jeepneys.
Suno kay Altura sa paghinun-anon ni Bacolod City Mayor Alfredo “Albee” Benitez sa LTFRB Region 6, ila nakasugtan nga palawigon sa Enero 31 ang pagbyahe sang traditional jeepneys bilang sabat sa kakulangan sang modernized jeepneys sa ciudad.
Dugang pa sini nga ang desisyon sa pagpalawig ang gikan kabangod ang ila polisa ang gikan sa LTFRB Central Office, kun sa diin nakapadala naman sang proposal ang alkalde nga sa karun nagapabilin pa nga pending.
Gani paathag ni Altura nga sa LTFRB nagapabilin nga indi pa makabyahe ang unconsolidated traditional jeepneys, magluwas na lamang kun amyendahan sang LTFRB Board ang memorandum nga nagapahayag nga expired na ang prangkisa umpisa Diyembre 31, 2023.
Kahapon, nakapagwa na sang Board Resolution No 2 series of 2023 ang LTFRB Region 6 gani opisyal na nga makabyahe ang mga unconsolidated traditional jeepneys tubtob Enero 31 kag sila ang indi dakpon sang katapo sang Land Transportation Office.
