BACOLOD CITY-Ginkompirmar sang pinuno sang Provincial Health Office nga may yara na sang local transmission sang coronavirus disease sa probinsya sang Negros Occidental apang wala sang community transmission.
Sa interview sang Bombo Radyo Bacolod kay Dr. Ernell Tumimbang, ginpahayag sini nga santo sa rekomendasyon sang Regional Health Office kag World Health Organization, ang local transmission ang classify sa tatlo.
Ini ang ginlakipan sang sporadic, clustering kag community transmission.
Ang sporadic transmission ang nagakatabo kun ang isa ka miyembro sang pamilya nga infected ang direkta nga nakalaton sa isa pa ka miyembro sini.
Ang clustering transmission naman ang nagaluntad kun ang nalatnan sang positibo ang indi miyembro sang iya pamilya kaangay sang grupo sang mga bikers nga natabo sa syudad sang Talisay, Negros Occidental.
Samtang ang community transmission naman ang marekord sa tion nga malatnan na ang sa eskwelahan, tindahan ukon terminals sang public transport.
Suno kay Tumimbang, nabaton na sini ang DOH advisory nga mahimo na papaulion ang mga nakatapos na sang 14 days quarantine apisar nga wala pa ang resulta kag asymptomatic man ini.
