Ginpahayag sang isa ka sports analyst nga kaangay sang chess match ang hampang nanday Filipino boxer Marlon “The Nightmare” Tapales kag Japanese boxer Naoya “The Monster” Inoue kagab-i.
Madumduman nga napaluhod ni Inoue si Tapales sa ika-10 nga rounds kag ginpauntat na lamang ang hampang gani yara na sa karun sa kamot ni Inoue ang apat ka mga paha sa super bantamweight division.
Sa interview sang Bombo Radyo Bacolod kay Sports Analyst Ed Tolentino, underdog katama si Tapales, apang nagpakita ini sang maayo nga hampang gani nagdangat sa 10 rounds ang match.
Maayo man suno diri ang estilo sang Filipino boxer bangod nabudlayan si Inoue nga maigo ini sa nawong kag nagaka-expose man sini ang kahinaan sang Japanese boxer.
Apang nakita ni Tolentino nga mas madamo sang puntos si Inoue pag-abot sa ginbuy-an nga inumol bangod ini ang nakabuya sang masobra 140 punches samtang si Tapales ang nagbuya lamang sang 52 punches.
Maayo man suno diri ang crouching style ni Tapales, bangod nagakaguba sini ang momentum ni Inoue.
Apang ginkapos naman ang depensa sini bangod indi kaangay sang iban nga boksidor nga nagapahuway kag ginatun-an anay ang kasumpong, sang nakita ni Inoue nga mabaskog ang depensa sang Pinoy, ini ang wala niya gin-untatan tubtob sa maguba kag malutsan ang depensa.
Suno diri, sa 10 ka inumol, okay na para kay Inoue basta ini ang makatupa sang bisan tatlo lamang ka solid punches.
Paathag ni Tolentino nga na-ideyahan man ni Inoue ang crouching style kun sa diin gin-atake sini gikan sa idalum si Tapales, samtang preparado naman ang isa pa sini ka inumol inkaso nga magtindog na ang Pinoy boxer.
Apang, nakita man sini nga madamo sang kahigayunan si Tapales nga maka-atake apang nauyang sini.
Suno kay Tolentino, 30 anyos pa lamang si Inoue kag madamo pa ini sang malab-ot.
Si Inoue ang labing una nga Asian boxer nga nangin nakakapot sang apat ka championship belts sa super bantamweight division, kag madamo naman sang nakahelera nga sunod sini nga makasumpong.
Apang indi na bag-o kay Inoue ang pasudungog bangod siya ang nangin undisputed bantamweight champion man sang 2022.
