Nagapadayon pa ang imbestigasyon sang Bacolod Police Station 6 sa gin-aligar nga pag-abduct sa isa ka lalaki sa Adelfa St., Brgy. 40, syudad sang Bacolod kaina sang aga, Hunyo 1, 2022.
Sa interview sang Bombo Radyo Bacolod kay Police Major Leo Estopa, station commander sang Bacolod Police Station 6, sa ginkilala kay Ricky Vonn Apuhin, 34 anyos residente sang JR Torres Avenue, Brgy. Singcang-Airport kag isa ka sports game agent.
Suno kay Estopa santo sa ila imbestigasyon kag sa nakita man sa CCTV footage sa nga ginrequest sa DRDC building, ginkuha sang apat ka wala pa makilal-an nga mga persona nga nanaog gikan sa isa ka maroon nga Toyota Innova nga wala sang plate number.
Sang ginkuha ang biktima kaupod man sini ang iya live-in partner bangud bag-o pa lamang sila tapos kaon.
Ang wala makilal-an nga mga lalaki nga nagkuha sa biktima ang nagasuksok sang sweatshirt nga may hood kag nagaface mask.
Suno diri, ginbantayan sang apat ka persona kag ginpasakay ang biktima sa iya man lang salakyan nga Hyundai accent kag nagpadulong sa sur nga direksyon; samtang ang Innova naman ang nagpadulong sa Lacson Street nga direksyon.
Dugang pa ni Estopa, wala sang standing warrant of arrest ang biktima kag wala man sang pagpamwersa nga natabo sa pagdala sang biktima.
Sa karun padayon pa ang imbestigasyon sang mga kapulisan sa nasambit nga insidente agud nga matumod ang motibo sa pagabduct sa biktima.
