Padayun pa nga nagahulat sang klaripikasyon gikan sa Sugar Regulatory Administration si Negros Occidental 5th District Representative Atty Dino Yulo angot sa tuman ka nubo nga opening price sang kalamay.
Sa interview sang Bombo Radyo Bacolod sa kongresista, wala sang problema kun yara sa P2 tubtob P3 ang pagpanaog sang presyo, apang nagdangat na sa masobra P100 ang ginpanaog sa presyo kun ikumpara sang nakaligad nga lima ka semana.
Suno diri, ang pinakamataas nga millgate price ang yara sa Southern Negros Occidental nga masobra P2,300, samtang mas manubo naman sa Northern Negros Occidental nga yara na lamang sa P2,200.
Pahayag ni Yulo nga una na nga nakasulat sila nga mga Kongresista angot sa isyu, apang wala pagid gihapon sang sabat ang SRA.
Nagakahangawa ang kongresista nga kun magpadayun, ini ang makatuga na sang krisis sa industriya sang kalamay sa Negros, nga kilala bilang sugar bowl of the Philippines.
Ang kongresista ang nakabatun sang unvalidated report nga may mga planters nga wala nabaligya ang ila kalamay bangod wala sang bidders, gani sila ang nag-advance na lamang.
May iban pa nga ginhimo na lamang partial ang payment.
Pahanumdom ni Yulo nga ang planters ang kinahanglan man magbayad sa mga nagatapas sang tubo kag iban pa nga obrero gani kinahanglan nga mabaligya ang ila kalamay.
Nagalaom ang kongresista nga magsabat ang SRA, kag hatagan sang solusyon ang problema.
