Natapos na ang proseso sang programa nga Small Business Wage Subsidy (SBWS) sang Social Security System (SSS) kag ginahanda na ang 2nd tranche.
Suno interview sang Bombo Radyo Bacolod kay Lina Vergara Hilado, Branch Manager sang SSS Bacolod, natapos na ang proseso sang programa kag nakasugod naman ang pay-out.
Ang ini nga programa sang gobyerno ang ginlunsyar para sa mga magagmay nga negosyo nga naapektuhan sang COVID-19 crisis.
Ini agud nga mahatagan sang cash aid ang mga empleyado nga wala makaobra kag wala na sang sweldo, kag mabuligan man ang mga small business nga indi makasarang magpasweldo sa mga trabahante sini.
Ang mga nakabaton amo ang mga ginpasa sang employer ang pangalan sa BIR.
Gin-aprobahan ini sang BIR kag ginpasa naman sa portal sang SSS agud makaupod sa mga pagahatagan sang bulig pinansyal.
Suno kay Hilado, importante gid nga rehistrado ini sa SSS bangud indi makakuha kun wala pa makaregister.
Ang cash aid ang nagabalor 5,000 tubtob 8,000 depende sa lugar, samtang 6,000 naman ang kalabanan nga ginhatag sa Negros Occidental.
May ara sang duha ka tranches, kag natapos na hatag ang 1st tranche nga ang payroll asta sa Mayo 15, samtang nagasugod naman ang mga ini sa pagbayad para naman sa 2nd tranche.
Natapos na ang pagproseso sa Mayo 8, kag magasugod naman ang payroll sang 2nd tranche sa Mayo 16.
Ginaklaro naman sini nga ang ginhatagan amo ang mga yara sa middle class earners, bangod nahatagan na sa SAP kag CARP ang mga lower class.
Wala naman diri nakabahin ang mga dalagko nga tax payers, kag mga dalagko nga kumpanya.
Nahibaluan naman nga may ara mga dalagko nga kumpanya ang wala nagapasweldo sa mga empleyado sini, gani ginpalab-ot naman ini sa management. Samtang, Magalunsyar man ang Social Security System sang Calamity Loan Program sa mga apektado sang krisis dulot sang COVID-19.
Suno sa interview sang Bombo Radyo Bacolod kay Rina Vergara Hilado, Branch Manager sa SSS Bacolod, nga dapat nakarehistro gid sa my.sss agud nga maka avail sa amo nga programa.
Ginapahibalo sini nga sa my.sss nga account igasulod ang kaangay sang calamity loan kag salary loans.
Sarang man ini ma tsekyar pinaagi sa mobile phone application.
Samtang, wala paman nakabatun sang go signal ang SSS nga masuguran na ang amo nga programa, bangod gina-una pa nga tapuson ang programa nga Small Business Wage Subsidy (SBWS).
Agud nga maka-avail sang programa, kinahanglan nga miyembro gid ini sa SSS kag may 36 months nga payment.
Samtang, dapat naman nga may ara ini sang 6 months nga bag-o nga kuntribusyon.
Indi naman maka avail ang mga may nabilin pa nga balayran sa mga loan program sang SSS, kag may balanse pa sa Calamity Loan, kaangay sa mga naka avail bangod sa krisis sa paglupok sang bulkang taal.
Samtang, wala paman sang abiso nahanungod sa dugang nga P1,000 sa ginabatun sang mga pensioner.
Gilayon ini nga iga-anunsyar agud nga makalab-ot sa mga miyembro.
