May panawagan ang senior citizen nga si Purita Paguntalan sang Brgy. Tanza, EB Magalona, Negros Occidental sa naggamit sang iya ngalan kag record agud nga maka-loan sa Social Security System.
Nakaprenda sadto sa JGM Finance Corporation sa Silay City ang iya nga ATM card para sa pension apang nafully paid na ini sang Marso 2026.
Nakibot si Paguntalan nga may buhin ang iya pension sang nagwithdraw siya sang June 1, 2026.
Iya natukiban nga may P72,000 siya nga pension loan sa SSS kag may P3,000 monthly deduction.
Bangud sini, P5,000 nalang ang iya pension imbes nga P8,000.
Suno sa iya, wala siya naka-loan sa SSS bangud indi man siya makahibalo magprocess.
Ginalantaw ni Paguntalan nga mahimo empleyado sang JGM Finance Corporation ang nagprocess sang iya loan bangud ginpapirma siya sa blangko nga papel kag ginkuhaan sang picture sang ginrelease ang iya nga ATM card.
Wala na sang iban nga ginasuspetsuhan si Paguntalan bangud wala man sang iban nga nakahibalo sang iya personal information magluwas sa empleyado sang JGM.
Panawagan niya sa nagloan sa iya SSS pension nga bayaran na lamang ini agud mabalik ang normal niya nga ginabatun.
Pahayag sini nga dako katama ang P72,000 nga sa Hunyo 2028 pa ma-impas, kag ang kantidad ang mabakal pa sini kuntani sang bugas kag bulong.
Samtang sa bulig sang iya hinablos nga si Josephine Banhao, nakumpirmar nila sa SSS Victorias, kun sa diin nagloan, nga ang kwarta ang ginpasulod sa Union Bank.
Nahibaluan nga may apat ka loan history si Paguntalan nga ginalakipan sang 2017, 2019, 2021 kag April 2026.
Apang suno kay Banhao, ginapanindugan sang iya tiya nga makaduha lamang ini magloan kag wala na nakahibalo sang duha nga naulihi.
Suno diri, ang ulihi nga loan ang sa balor nga P46,000.
Nakuha man nila ang cellphone number nga ginregister sang nagloan.
Ini ang gintestingan na sang Bombo News Team nga mapadal-an sang P1 paagi sa online cash transfer, kag nakumpirmar nga ini ang rehistrado.
May ginhatag naman nga pormas ang National Telecommunications Commission nga filloutan sang natungdan agud sila ang mabuligan sa pagkilala sa scammer.
