Una na nga ginkalipay sang mga driver ang panugyan sang National IATF nga pagahemuon .75 meter ang distansya sa pampubliko nga transportasyon humalin sa anay isa ka metro.
Suno kay Jessie Ortega, Secretary General sa Sentrong Samahan nang mga Tsuper at Operators Negros (SSTONE), sarang ini kuntani nga makadugang sang bisan duha ka pasahero kun natuman.
Apang, wala gin aprubahan ni President Rodrigo Duterte ang amo nga panugyan gani magapabilin nga isa ka metro ang dapat nga distansya.
Suno kay Ortega, kun isa ka metro apat lang ang sarang nga mangin pasahero sang jeep sa isa ka side samtang lima naman sa malaba nga jeep ukon siyam tubto onse kun pagadal-on ang yara sa tupad sang driver.
Ang pagsulundan naman nahanungod sa barrier ang nahibaluan nga ginmando sang Land Transportation Franchising Regulatory Board (LTFRB).
Apang suno kay Ortega, apisar nga may one meter distancing nga mando, matalupangdan nga wala nagadangat sa isa ka metro ang distansya sang mga gintakod nga barrier sa jeep bangod nagapanginyawat man ang mga driver.
Suno diri, kun pagasundon gid ang 1 meter rule, tatlo nalang ang sarang nga mangin pasahero sang mga jeep sa isa ka bahin ukon pito sa kabug-usan.
Apisar nga 50 porsyento ang sarang nga masakay sang mga jeep, pahayag ni Ortega nga tuman naman ka iwat sang mga sumalakay.
Makakuha lang ang mga ini sang kumpleto nga pasahero kun magpila sa terminal, apang kun magalambiyong na sa ruta, tatlo na lamang ang pinaka mataas sang mga ini nga makuha nga pasahero.
Nagapangabay naman ini nga indi pagpatam-an sang gobyerno ang mga drivers agud nga makapadayun nga mabuhi.
Nagapati naman ini nga mabaskog na ang proteksyon sang mga drivers bangod sa barrier, facemask kag faceshield.
Ginakahangawa man sini ang posibilidad nga makita sang national IATF nga sarang ma contaminate ang mga kwarta kag magpagwa sang mando nga pagsuksok sang gloves.
