Magabutang ang Barangay Council sang Mansilingan sang bubon sa St. Benilde Homes agud nga makapiyan-piyan sa problema sang mga pumuluyo sa tubig.
Sa interview sang Bombo Radyo kay Punong Barangay Rodolfo Pico, madugay na ang problema sa St. Benilde Homes kag wala nahatagan sang solusyon sang developer.
Sang Lunes, nagpadulong sa barangay hall ang presidente sang St. Benilde Homeowners Association kag nagfile sang complaint batok sa caretaker sang tangke sang tubig.
Ginwelding ang twerka sa motor sang tangke kag wala na gid sang tubig gani nagpangayo sila sang bulig nga mabutang anay sang artesian well sa plaza kag sa sulod sang subdivision agud nga may kuhaan lang sila sang tubig.
Nagalaom naman si Pico nga masuguran na sa masunod nga semana ang pagdrill sang deep well agud nga may makapiyan-piyan sang ila nga kinahanglanon nga tubig.
Suno kay Pico, ipasummon sang barangay ang caretaker agud nga makapaathag kun ano gid ang kabangdanan nga wala na nagatubod ang tubig.
Igaschedule naman ang hearing kag padal-an sang notice of hearing ang caretaker kag ang developer agud nga makatambong.
Bangud sa kadamuon sang reklamo nga ginapadangat sa Lupon ng Barangay, indi pa matumod sang punong barangay kun san-o matalana ang hearing.
Suno kay Pico, indi pa man ma-locate kun sa diin ang developer.
Suno sa barangay official, indi ini sigurado kun masarangan sang mga homeowners ang pagpadalagan sang water system kun ila ini nga itake over.
Aminado si Pico nga kalabanan nga developer sa Mansilingan ang may kaugalingon nga water system sa sulod sang subdivision kun sa diin dira man nagabayad ang mga homeowners.
Indi pa man niya matumod kun ano na ang nahimo nga tikang sang developer kasunod sang reklamo sang home owners association.
Sa tion nga indi magpakita sa hearing ang developer, magaissue ang Lupon sang Certificate to File Action nga gamiton sang mga home owners sa pagfile sang complaint sa korte.
