Gin-athag sang officer-in-charge sang Santa Catalina Municipal Police Station nga indi contrator ang biktima sa nagluntad nga shooting incident sa Sitio Omanod, Brgy. San Francisco, Santa Catalina, Negros Oriental, kahapon sang aga.
Ginkilala ang biktima kay Engr. Angelito Mendoza, 58 anyos, residente sang Barangay Manalongo kag isa quarry operator.
Sa interview sang Bombo Radyo Bacolod kay Police Captain Edjel Tablate, estable na ang kahimtangan sang biktima sa ospital matapos nga ini ang nakaangkon sang pilas tuga sang pagkatiro.
Madumduman nga magapadulong kuntani ang biktima sa quarry site nga nahamtang sa Sitio Omanod, Brgy. San Francisco sakay sang iya motorsiklo.
Apang pag-abot sa lugar sang insidente, ginluthang ang biktima sang makatatlo ka beses sa iya likod rason kun ngaa natumba ini kag ang iya motor.
Suno kay Tablate, padayon ang ila nga imbestigasyon sa nagluntad nga shooting incident.
Ginalantaw nga motibo sa krimen ang trabaho sini kag sadtong 2013 nagpablotter ini matapos nga makabaton sang pamahog nga siya ang patyon.
