Gin-athag sang hepe sang Sta. Catalina Municipal Police Station nga wala sang koneksyon sa flood control project ang contractor nga gintiro sa nasambit nga banwa sang Agosto 27.
Madumduman nga pilason ang isa ka contractor matapos ginluthang samtang sakay sa motorsiklo sa National Highway sang Sitio Lagtang, Barangay San Pedro, Santa Catalina, Negros Oriental.
Ang biktima ang ginkilala nga si Engr. Angelito Mendoza, 58 anyos, contractor, residente sang Brgy. Manalongon, Santa Catalina.
Ini ang nakaangkon sang duha ka igo sa likod, isa sa baga kag isa sa tiil.
Sa interview sang Bombo Radyo Bacolod kay Police Captain Edjel Tablate, Officer in Charge sang Sta Catalina Municipal Police Station, ang biktima ang nagapabilin sa karun sa ospital kag natalana nga operahan agud nga kuhaon ang bala sa abaga sini.
Ginpahayag man sini nga bangud nag-expire na ang permit sang contractor para sa quarry operations gani nagkuha ini sang permit agud nga mabaligya nalang sini ang stockpile ukon ang aggregates.
Suno kay Tablate, madamo man sila sang ginalantaw nga motibo sa pagtiro sa contractor kag santo sa personal nga assesment sang hepe nga old grudge ang isa sa mga motibo.
Wala pa man nila napasa ang CCTV footage nga ila nakuha sa crime scene sa Regional Anti-Cybercrime Unit sa Police Regional Office-Negros Island Region.
Wala pa ang mga ini sang natumod nga suspek sa krimen apang padayon man ang ila nga pagpamangkot sa palibot kun may nakawitness kag nakatumod sa may kahimuan sang krimen.
Gin-athag man sini nga ang contractor ang wala sang kaangtanan sa kontrobersyal nga flood control projects sang Department of Public Works and Highways (DPWH).
