Gintupok sang kalayo ang staff house sang isa ka furniture shop sa Lacson Extension, Brgy Taculing, Bacolod City kaina sang udto.
Sa interview sang Bombo Radyo kay Janry Gumban, empelyado sang Rojo’s Muebles and Crafts, napanimahuan sini nga kaangay may nagakasunog nga kuryente kag didto na lamang sini nakita nga may yara na sang sunog.
Suno diri, ginhingagaw pa nila nga magkuha sang fire extinguisher apang wala na nila natigayon nga mapatay ang kalayo matapos nga naglapta na ini.
Gintupok sang kalayo ang isa ka panalgan sang ila staff house kag wala na sini natigayon pa nga masalbar ang iya mga bayo, mga ID, duha ka alkansiya kag iban pa nga gamit.
Samtang nahingagaw naman ni Gumban nga masalbar ang iya motorsiklo, apang may yara sang duha ka motorsiklo nga nasunog kag isa ka salakyan nga partially burned.
Suno kay Gumban, electric fan kag socket lamang ang may yara sila sa staff house kag ginasuguro man nila nga wala sang may napabayaan nga naga-andar nga electric fan kag nakakas ang mga cellphone nga nakacharge.
