Temporaryo nga ginpaidalum sa lockdown ang City Health Office sang Silay City until further notice bangud may isa ka health care worker nga nagpositibo sa coronavirus disease.
Sa interview sang Bombo Radyo kay Silay City Health Officer Dr. Sabina Damaso, residente sang Bacolod City ang nasambit nga health care worker.
Suno kay Damaso, ang nasambit nga tikang ang agud mapunggan ang paglapta sang balatian kag agud makapatigayon sila sang contact tracing.
Suno sa iya, may yara na sang 15 ka mga persona nga naidentify nga nakaclose contact sang pasyente kag ginkuhaan naman sang RT-PCR test kahapon.
Suno diri, kun magnegatibo ang mga ini sa swab test, sarang na nga magbalik sa operasyon sang CHO sang Silay.
Nalakip man sa ginlockdown ang isa ka balataan nga nahamtang sa likod sang CHO bangud nagpadulong man didto ang nasambit nga health care worker.
Nagapangayo naman sang pasaylo si Damaso sa mga pumuluyo sang Silay sa pagpasirado sang CHO kag nagapangabay nga magtuman sa mga health protocols kaangay sang pagsuksok sang face mask, face shield, pag-obserbar sang social distancing kag paglikaw sa mga pagtililipon.
