Magluwas sa mga public and private organizations lakip na ang mga private citizens, aktibo man nga nagpartisipar sa “Dugong Bombo 2024: A Little Pain, A Life to Gain”, blood donation program sang Bombo Radyo Philippines in partnership sa Philippine Red Cross ang pila sa mga staff sang Bombo Radyo kag Star FM Bacolod.
Wala natapos ang partisipasyon sang network staff sa pagpreparar kag pagpanguna sa programa bangod pila sa amon ang nagdonar mismo sang dugo.
Nagapanguna diri si Bombo Daniel Lecciones, ang station manager sang Bombo Radyo Bacolod, nga suno sa iya sa umpisa lamang mabatyagan ang gamay nga sakit kag madasig lamang ang pagpuno sang bag sang dugo.
Magluwas sa maayo sa pamatyag ang pagpakuha sang dugo, mas maayo pagid sa pamatyag nga mahibaluan nga ang dugo ang sarang makapalawig sang kabuhi sang iban.
Aminado ang station manager nga indi na sini madumduman kun makapila na nagdonar sang dugo sa Dugong Bombo.
Sa pihak nga bahin, masobra isa ka dekada naman nga nagadonar sang dugo sa Dugong Bombo si Bombo Dennis Rubica.
Antes paman ang blood letting activity, ginseguro sini nga kondisyon ang lawas pinaagi sa pagtulog sang indi magnubo walo ka oras agud mangin successful blood donor.
Suno diri, nagamag-an ang iya pamatyag matapos magpakuha sang dugo kag nagaayo man ang gana sini sa pagkaon.
Apisar nga 57 anyos na kag tatlo ka tuig nalang mangin senior citizen na, maayo gihapon ang kondisyon sang anchorman.
Suno kay Bombo Dennis, bisan magdangat pa sa senior citizen, kun maayo lang ang kondisyon sang lawas, sarang gihapon nga makadonar sang dugo.
Siya ang masobra napulo ka tuig na nga nagadonar sa Dugong Bombo bloodletting activity.
sa ikaduha nga kahigayunan, liwat man nga nagdonar sang dugo si Bombo Denver Quijano.
Paathag sini nga nakaligad nga tuig ang una niya nga pagpakuha sang dugo sa Dugong Bombo matapos makasulod bilang field reporter sang network.
Apang kolehiyo pa lamang sa Sagay City, siya ang masami na nga nagadonar sa mga blood letting activities upod sa ila fraternity.
Magluwas sa ila, nagdonar man sang dugo sanday Bombo Ann Sindol Sorilla, Bombo Pons Espino, Bombo Maycea Ofamen, kasubong man sanday Star DJ Usher kag Star FM technician Audie Parreño.
