Ginpaandaman sang Department of Energy (DOE) ang mga stakeholders sa sektor sang enerhiya nga sila ang mangatubang sang nagakaigo nga sanctions kun mapamatud-an nga sila ang may kakulangan sa ila nga bahin nga nangin tunaan sang asod-asod nga forced outages sang pila ka mga power plant.
Suno kay Energy Undersecretary Mario Marasigan, ginahulat pa sang DOE ang paathag sang mga power generation companies kag National Grid Corporation of the Philippines (NGCP) natuhoy sa insidente kag sa timeline sang pagbalik sang serbisyo.
Samtang, liwat nga ginpaidalom sa yellow kag red alert ang Luzon kag Visayas grid bangud sa kakulang sang suplay sang kuryente kag mas mataas nga demand tuga sang mainit nga panahon.
Ginpahayag sang DOE ang liwat nga posibilidad sang rotational brownouts kun magpadayon nga nubo ang reserba sang kuryente.
