Nadeklarar na ang State of Calamity sa bilong nga probinsya sang Negros Occidental.
Sa resolution no. 6 series of 2025 nga ginpasar sang Sangguniang Panlalawigan, ipaidalom ang bilog nga Negros Occidental sa State of Calamity santo sa rekomendasyon sang Provincial Disaster Risk Reduction and Management Council.
Duha naman ang ginlatag nga rasun, nga ginalakipan sang kahalitan sang mabaskog nga ulan nga nagtuga sang mga pagbaha dala sang Southwest Monsoon ukon Habagat nga ginpabaskog sang Bagyo Crising; kag ang outbreak sang Red-Striped Soft Scale Insect (RSSI) nga nakahalit sa mga katubuhan.
Sa pahayag ni Negros Occidental Governor Eugenio Jose “Bong” Lacson, ini ang resulta na sa ginpagwa sini nga executive order, nga nagapanawagan sa provincial council nga suportahan ang tikang.
Interview with Negros Occiddental Governor Eugenio Jose “Bong” Lacson
Sa recent data, 134 ka mga Barangay ang apektado gikan sa 21 ka local government units.
Ini ang nagdangat sa 35,312 ka pamilya, apang ang numero ang padayun pa nga nagasaka.
Dako man ang nangin kahalitan sini sa agrikultura, imprastraktura kag lokal nga ekonomiya.
Suno kay Lacson, sarang na nga magamit sang mga apektado nga LGUs ang bahin sang ila nga disaster funds agud magamit sa pag-address sa mga problema.
Sa pihak nga bahin, bangod province-wide ang deklarasyon, nagapati ini nga indi tandugon sang mga LGUs nga wala man sang kahalitan ang ila nga disaster fund.
Ini bangod tunga-tunga palang sang tuig kag madamo pa sang bagyo nga magasulod.
Dugang pa sini nga Southern Negros Occidental sa karun ang apektado bangod sa Southwest Monsoon, apang ginalantaw sini nga sa pagliso sa Northeast Monsoon ukon Amihan, ang Northern Negros Occidental naman ang mahimo makabatyag sang mga madamol nga ulan.
