SA NEW ZEALAND – Gindeklarar ang State of Emergency sa northern kag eastern New Zealand nga naapektuhan bangod sa pagwaswas sang Typhoon Gabriel nga nagtuga sang mga pagbaha kag landslide.
Suno kay Bombo International Correspondent Tide Rogacion, halos tanan nga mga naapektuhan amo ang mga coastal areas.
Sa karun nagapabilin pa gihapon sa sulod sang area of responsibility sang New Zealand apang sa karun nangin matawhay na ang sitwasyon kag nagapakita naman ang adlaw.
Sa pagbanta sang mga Pilipino sa New Zealand, ang bagyo ang katumbas sa Tropical Storm Signal No. 2 sa Pilipinas.
Apang paathag ni Rogacion nga bangod troso ang nagapanguna nga palangabuhian sa mga apektado nga lugar, kag sa masami wala ginahimos ang mga magagmay nga debris gikan sa mautod nga kahoy, ini ang nadala sang pagbaha kag nagdaludo gikan sa mga hills padulong sa mga pamalay.
Bangod sa mabaskog nga daludo, madamo naman sang mga magagmay nga taytay nga nagkalaguba.
Suno kay Rogacion, may mga pamalay man nga nahamtang sa kilid sang mga hills ang naulamid sa pila ka mga landslides.
Apang bangod may nauna na nga bagyo nga nagsulod nakaligad nga semana, naka-evacuate naman ang kalabanan sa mga pumuluyo.
Pahayag ni Rogacion nga duha ang reported nga napatay bangod sa bagyo nga ginalakipan sang isa ka fireman.
Suno diri, ginrescue sang fireman ang mga pumuluyo sa isa ka balay nga naanod sang daludo sang tubig, apang matapos nga masalbar ang mga biktima, ang fireman amo ang wala nakagwa sa balay kag kaupod nga naanod.
Sa karun ginalantaw pa nga maga-upod si New Zealand Prime Minister Chris Hipkins sa aerial inspection agud matumod kun ano ka dako ang nangin halit sang bagyo.
May assessment naman nga ginapatigayon sa mga pamalay agud matumod ang lebel sang halit kun sa diin may ginabutang nga color-coded sticker nga pagabasehan sa ayuda nga ila mabaton gikan sa gobyerno.
