Para sa kilala nga political analyst nga indi mapatihan ang mga pahayag ni former Ako Bicol Representative Zaldy Co kag dako ang posibilidad nga ang pamilya Duterte ang yara sa likod sini.
Tatlo na ka videotaped statement ang ginpagwa ni Co sa pag-akusar sini kay President Ferdinand Marcos Jr. kag anay House Speaker Martin Romualdez nga nakabaton sila sang kickbacks halin sa flood control projects.
Sa interview sang Bombo Radyo Bacolod Atty Jomax Ortiz, nakadepende na sa Pilipino kun magpati ukon indi sa pahayag ni Co apang para sa iya kaangay nga mapatihan man ini bangod kilalahay kag malapit si Co kay Marcos kag Romualdez.
Apang, madamo sang palamangkotanon sa mga pahayag sang anay kongresista bangod imposible nga wala gid siya sang may nakuha nga kickbaks man.
Dugang pa Ortiz, palamangkotanon man kun diin ginkuha ni Co ang iya eroplano kun bala antes ini nagpungko bilang opisyales sang gobyerno ukon sang nakapungko na sa pwesto.
Samtang yara man ang palamangkotanon kun san-o gid man natabo ang ginhambal sini nga mga insertions.
Pahayag ni Ortiz, dako ang iya pagpati nga ang pamilya Duterte ang nagtulod kay Co nga maggwa bangod natiming ini sa ginpatigayon nga rally sang Iglesia Ni Cristo kun sa diin gin-gamit ni Senator Rodante Marcoleta ang iya statement rally.
Samtang, ginpahayag man ni Ortiz nga drama-drama lamang ni Co nga magpaniwang agud makuha ang simpatiya sang tawo.
Suno sa political analyst, ang ginahimo ni Co makabenepisyo sa mga Duterte kag posible nga maabot ang tion nga may ifile nga impeachment complaint batok sa presidente.
