Nagapanawagan ang station commander sang Bacolod Police Station 1 nga kuntani indi na masulit ang pagtililipon nga natabo sa Bacolod Public Plaza kahapon matapos nagpadulong ang mga supporters ni anay Congressman Albee Benitez sa lugar agud magpakita sang suporta.
Hinali nalang nga nagdamo ang mga nagpadulong sa plaza dala ang tarpaulin para sa pagsuporta sa anay kongresista nga nagtransfer sang registration sa Bacolod.
Madamo nga mga grupo ang nagtipon nga ginabug-usan sang nanari-sari nga mga sektor sang kumunidad.
Pila man ka anay opisyal sang Negros Occidental kag iban pa nga indibidwal ang gin-issuehan sang citation ticket matapos nagbayolar sa health protocols.
Sa interview sang Bombo Radyo kay Police Major Ramel Sarona, station commander sang Bacolod Police Station 1, nagapanawagan ini nga kun posible, indi na kuntani masulit ang kaangay nga insidente ilabi na nga napaidalum sa general community quarantine (GCQ) with heightened restrictions ang ciudad.
Suno sa iya, ila lang ginasaway kag ginhatagan citation ticket kahapon ang mga wala nagsunod.
Suno diri, masobra 20 ang mga violators nga wala nagasuksok sang facemask, faceshield kag nagaobserbar sang social distancing.
