Ginalantaw sang station commander sang Bacolod Police Station 2 nga may kaakig ang mga suspetsado sa pagluthang-patay sa 29-anyos nga lalaki sa Purok Nangka, Brgy. 3, Bacolod City, alas 8:13 sang Domingo sang gab-i.
Madumduman nga ginkilala ang biktima kay Raymund Apelledo, 29-anyos, may live-in partner, kag residente sang Purok Tilapia sa nasambit nga barangay.
Ginsugat ang biktima ni certain Clintoy sa ila balay kag nag-upod naman diri si Apelledo kag nag-angkas sa motorsiklo sini.
Nagapati ang kapulisan nga may nagluntad nga paglalisanay kag posible nga gindala ang biktima sang nagsugat sa iya sa iban sini nga mga kaupod sa grupo kag didto ginluthang.
21 ka empty shells kag tatlo ka slug sang caliber 9mm nga armas luthang ang narecover sa crime scene.
Ginalantaw man nga masobra sa isa ka persona ang naghimo sang krimen.
Suno kay Police Captain Paul Vincent Pendon, station commander sang Bacolod Police Station 2, posible nga may kaakig ang suspestado kay Apelledo kag kun may kaakig, posible nga may ginhimo ang biktima nga malain.
Suno kay Pendon, sang 2017, nadakpan si Apelledo nga nagapatigayon sang illegal gambling kag nakuhaan man ini sang sachet sang suspected shabu.
Apat ka tuig ini nga napriso kag masobra isa ka tuig na nga nakagwa.
Ginalantaw nga ang biktima ang suspetsado sa pila ka mga snatching, carnapping kag robbery hold up nga mga insidente sa area sang Bacolod Police Station 2.
Posible man suno kay Pendon nga may lansihanay ang mga suspetsado kag ang biktima sa illegal nga transaksyon ukon druga.
Ginakasubo sini ang hitabo ilabi na nga ginhatagan man kuntani sang tiyansa si Apelledo nga magbag-o.
Gina-engganyo naman sini ang pamilya sang biktima nga ipa-autopsy ang bangkay.
