Ginatun-an pa sang Bacolod City Govenment ang status sang duta sa nasunog nga bahin sang Barangay 27 para sa next action plan.
Sa interview sang Bombo Radyo Bacolod kay Atty Mark Mayo, pribado ang nagapanag-iya sang duta kag gamay lamang nga porsyon diri ang ginapanag-iyahan sang ciudad.
Wala ginadula sa ila opsyon ang paghatag sang rellocation.
Suno diri, may team na nga gintukod si Mayor Greg Gasataya nga magatuon kun paano mas ma-utilize ang mga propedad nga nabakal sang City Government.
Lantawon nila kun may mga areas nga sarang maconvert bilang relocation sites.
Sa karun nagapabilin sa Apolinario Mabini Elementary School ang mga evacuees gikan sa 216 ka mga pamalay nga nahalitan sang sunog nga ginalakipan sang 213 nga totally damages kag tatlo nga partially damaged.
Suno kay Mayor, insigida ang paghatag sang bulig sang local nga gobyerno sa pagpanguna ni Bacolod City Mayor Greg Gasataya, partikular na sang mga pagkaon.
Naga-assist man ang Department of Social Services and Development (DSSD) kag Department of Social Welfare and Development (DSWD).
Ginhatagan man ang mga fire survivors sang tubig, sleeping kits kag toileries.
Na-apresyar man nila ang management sang eskwelahan nga nag-akomodar sa mga biktima.
Suno kay Mayo, 16 ka adlaw lamang sarang magamit ang eskwelahan bilang evacuation center.
Gani sila ang magapangita na sang mahimo masayluhan agud makabalik naman ang klase.
Ginapasalamatan man ni Mayo ang pribado nga mga indibiwal nga nagpadala sang donasyon.
Sila ang may social worker nga gintalana nga amo ang magahandle sang donasyon.
Suno kay Mayo, indi man nila pwede nga ipasuksok nalang gilayon ang mga used clothings, gani ini ang ila pa nga gina-organisar.
