Ginakabig na sang National Bureau of Investigation (NBI)- Bacolod nga person of interest ang stepfather ni Pearl Joy Galve.// Suno kay Executive Officer William De Arca, padayon ang ila backtracking sa posible nga ginpadulongan ni Pearl Joy kag kun sin-o ang kaupod sini.
Suno diri, ila na ginareview ang tanan nga CCTV footage nga ila nakuha gikan sa mga area nga posible nakit-an ang biktima.
Pahayag ni De Arca, ila ginapadulongan ang place of incident sa Hda. San Roque, Barangay Cubay, La Carlota City, kag suno sa iya 700 meters ang kalayuon sang kampo gikan sa highway kag halin sa magamay nga alagyan 40 meters ang dapat nga lakton tubtob nga malab-ot ang area kun diin ginbilin ang bangkay.
Bangod sini, nagapati ang NBI nga tatlo tubtob sa apat ang suspetsado.
Dugang pa sini, pila ka adlaw matapos nga nasapwan ang nagaka-agnas nga bangkay ni Pearl Joy, naglakat ang stepfather sini nga si Rene John Nasis nga tubtob sa karun wala pa nakapauli.
Sa karun si Nasis ang ginakabig nga person of interest sa pagpatay kay Pearl Joy.
