Ginpanginwala sang stepfather ni Pearl Joy Galve, nga ini ang may kahilabtanan sa krimen.
Sa exclusive phone interview sang Bombo Radyo Bacolod kay Rene John Nasis, gin-ako sini nga siya ang wala sa Bacolod City bangod sila ang may personal nga problema sang iya asawa nga si Jennifer Galve.
Una na nga ginpahayag ni Jennifer nga lima ka adlaw na nga wala nakapauli si Rene John matapos maglayas bangod sa pagpangimon.
Apang suno sa stephfather kahapon, sang mahibaluan nga may nasapwan nga bangkay sa ciudad sang La Carlota kag ginpadulungan ni Jennifer, utod sini kag hinablos, gilayon man nga nagcontact si Nasis sa utod sang asawa nga si Gina Malunes, agud hibaluon ang sitwasyon.
Madumudman nga nagaka-agnas na sang nasapwan ang bangkay ni Pearl Joy sa sulod sang kampo sang tubo sa Hacienda San Roque, Brgy. Cubay, La Carlota City kahapon sang aga, nga ginalantaw kapin lima ka adlaw na humalin sang napatay.
Suno diri, palangga man niya bilang bata si Pearl Joy, kag ini ang wala na nagpadulong sa La Carlota bangod indi sini mabatas nga makita ang sitwasyon sang dalagita.
Panindugan ni Nasis nga siya ang wala sang kahilabtanan sa krimen kag wala man sila sang paglainay sang buot sang bata.
Apang wala naman ini sang mahimo kun malain ang panulok sa iya sang mga tawo kag ang alegasyon ang handa man niya nga atubangon.
Pangabay na lamang sini nga konsensyahon ang nagpatay kay Pearl Joy, samtang nagapati man ini nga indi man malayo sa ila kag mahimo nga masobra sa isa ang nagpatay sa iya manak.
