Ginapanawagan sang stepfather ni Pearl Joy Galve sa mga suspect sa pagpatay sa iya manak nga magsungka na agud maklaruhan man ang iya pangalan.
Madumduman nga si Rene John Nasis alias Negro, ang personal nga nagdangop sa Criminal Investigation and Detection Group (CIDG) – Bacolod.
Sa interview sang Bombo Radyo Bacolod kay Rene John Nasis alias Negro, ginpili sini nga magtinir sa kustodiya sang CIDG, kun sa diin siya ang isa sa mga agents, bangod siya ang mas safe sa lugar karun nga madamo sang nagabasol kag nagatudlo nga siya ang may kahimuan sa pagpatay sang iya manak.
Si Pearl Joy, 15 anyos ang madumduman nga namissing sang Hulyo 29 sa Barangay Sum-ag, Bacolod City kag nasapwan nga nagakaagnas na nga bangkay sa La Carlota City sang Agosto 14.
Gin-athag man sini nga antes magpalayo, siya ang pila ka adlaw man nga nagbulig kay Jennifer Nasis, iloy ni Pearl Joy sa pagpangita sang dalagita.
Suno kay Nasis, indi na ini magpagwa sang dugang nga pahayag bangod mas nagagamo lamang ang iya sitwasyon.
Dugang pa sini nga siya ang nakahatag naman sang statement sa mga kapulisan, gani ini ang magahulat na lamang sang resulta sang imbestigasyon.
Mensahe sini sa iya mga kabataan nga sila ang iya palangga, kag ang mga ini ang nagapabilin sa iya nga pinsar.
Nahibaluan nga si Jennifer ang may tatlo ka kabataan kun sa diin ang subang nga si Pearl Joy kag ang ikaduha ang bata sini sa una nga bana, samtang ang agot ang ila ni Nasis.
Nagalaom naman ini nga makonsensya ang mga suspect kag magsungka na, agud nga matinluan man ang iya nga pangalan.
