Dal-on na pauli sa ila nga balay ang bangkay sang siyam ka tuig nga babayi nga napatay matapos ginlampusan sang bato ang tatlo ka mag-utod nga Bornales sa Hacienda Badiang, Brgy E. Lopez, Silay City.
Sa interview sang Bombo Radyo Bacolod kay Cristel Bornales, utod sang mga biktima sa una nga asawa sang ila nga amay, siya ang naga-asikaso sang papelis sa punerarya.
Madumduman nga napatay ang 9 ka tuig nga babayi, kritikal nama ang 15 anyos nga babayi samtang estable na ang kondisyon sang apat ka tuig nga lalaki.
Suno kay Bornales, wala na nila ginpa-autopsy ang 9 anyos nga napatay, agud ini ang mahatagan na sang kalinungan.
Aminado ang magulang nga nagalabu-anay ang iya amay kag iloy sang biktima, kag sila ang naga-upod na lamang para sa kabataan.
Ang ila iloy nga overseas Filipino worker (OFW) ang nagapadala na mismo sa 15 anyos paagi sa gcash, samtang ang amay naman ang nagatrabaho man bilang inkargado agud may mahatag sa kabataan.
Suno kay Cristel, adlaw adlaw ini nga nagabisita sa balay sang mga biktima bangod malapit lamang ang eskwelahan sang iya bata.
Dugang pa sini nga siya ang nagabaligya sang fishball sa balay apang sang Sabado, kaangay nga may nagapugong sa iya, gani wala ini nagbaligya ilabi na nga may-ara sang Bagyo.
Pangabay ni Cristel nga mahatagan sang hustisya ang iya mga manghod kag konsensyahon na ang suspect kag magsungka.
