Ginapahikutar sang alkalde sa ciudad sang Bacolod nga matakdan sang battery nga inverter ang solar power system sa Bacolod City Government Center imbes ipasulod sa net metering sang Negros Electric and Power Corporation.
Sa interview sang Bombo Radyo Bacolod kay Mayor Greg Gasataya, antes magtakop ang 2027, may-ara pa sang dugang nga mga electric vehicle nga baklon ang City Government.
Lakip diri ang duha ka e-vehicle para sa City Planning Office kag lima ka electric patient transfer vehicle ukon ambulansya.
Ini ang tikang sang City Government agud mapanubo ang fuel expense, samtang kabahin man sa commitment sa renewable energy.
Apang aminado ang alkalde nga sa pagdamo sang e-vehicle mahimo nga ang electricity cost naman ang magasaka.
Gani ginsugilanon na sini ang City Engineer’s Office nga mapangitaan sang inverter battery storage nga makonekta sa solar power.
Suno diri, sa karun ang solar panels sang City Government ang konektado sa net metering sang Negros Power gani tanan nga excess power nga makolekta ang diri nagakadto.
Pahayag ni Mayor Greg nga sa paggamit sang battery storage, ini ang magamit man para sa pagtukod sang dugang nga charging station sa e-vehicles.
Luwas diri, mangin prayoridad man sa solarization ang mga eskwelahan nga may dako nga power consumption.
