Napablotter na sa mga kapulisan sa Bantayan, Cebu ang gina-alegar nga strafing incident sa fishing boat nagikan sa ciudad sang Victorias, Negros Occidental kahapon sang aga.
Sa interview sang Bombo Radyo Bacolod kay Commander Jansen Benjamin, commander sang Coast Guard Station-Northern Negros, ang jurisdiction ang yara na sa Cebu bangud didto natabo ang gina-alegar nga insidente.
Suno kay Benjamin, ginparecord na sa mga kapulisan sang Bantayan ang insidente agud nga mapatigayunan sang nagakaigo nga imbestigasyon.
Suno diri, ang counterpart sang Coast Guard sa Cebu ang nagsend sang litrato agud nga magpahibalo sa Coast Guard sa Negros Occidental nga may yara sang isa ka body count kasunod sang insidente.
Suno sa Coast Guard Commander wala pa ang mga ini sang impormasyon kun nadala na pauli ang bangkay.
Ang biktima ang ginkilala kay Rex Dela Cruz, nga nag-agom sang igo sa dughan nga ginalantaw rasun sang iya kamatayon.
Indi pa matumod sa karun kun bantay-dagat gid man ang may kahimuan sang gina-alegar strafing.
Gin-athag man ni Benjamin nga ang bantay-dagat ang indi affiliated sa Coast Guard, sa baylo ang mga ini ang deputized sang Local Government Unit.
Sa karun, padayon pa nga ginaverify ang insidente agud mahibaluan gid kun ano ang matuod nga natabo.
