Nagalaom ang CENECO Union of Rational Employees nga mapatunga ang Department of Labor and Employment sa pito ka adlaw nga cooling period pagkatapos sang strike vote subong nga adlaw agud nga mahusayan na ang paghatag sang mga benepisyo sang mga empleyado sandto sa kaundan sang Collective Bargaining Agreement sang unyon.
Subong nga adlaw, nagboto na ang mga miyembro sang CURE kun dayunon ang strike ukon pag-untat sang trabaho bilang protesta sa wala pa napatuman nga CBA.
Ang CBA sang CURE ang gin-aprubahan sang Mayo 21 tuig 2021 kag gin-aprubahan sang Annual General Membership Assembly sang September 26, 2021 nga amo naman ang requirements sang National Electrification Administration agud nga mangin valid ang CBA.
Pila sa kaundan sang CBA amo ang signing bonus nga P15, 000 kag differential.
Apang tubtub subong, wala ini napatuman.
Bangud sini, nagsapol ang mga empleyado sang Disyembre 9 kag nahisugtan nga mafile sang notice of strike sang Disyembre 27.
Kaina sang udto, ginpahayag sang presidente sang CURE nga si Stefannie Montaner nga 220 na nagikan sa 322 ka empleyado ang nakaboto ukon katumbas na sang 65 porsyento sang kabug-usan nga numero sang mga empleyado.
Nagpasalamat naman si Montaner bangud malinong lang ang strike vote kag wala sang nagluntad nga gamo. Samtang, batunon sang CENECO Union of Rational Employees bisan staggered ukon utay-utay ang paghatag sang CENECO sang mga benepisyo nga nasulod sa Collective Bargaining Agreement sa tunga sang unyon kag sang management.
Suno sa presidente sang CURE nga si Stefannie Montaner, nagsapol na ang unyon kag ang management sang CENECO sang Nobyembre 29.
Diri ginpahayag sang management nga wala sang pondo para sa mga benepisyo bangud kulang ang kwarta sang power distributor.
Nobyembre 29, nagpirmahanay man sang kasugtanan ang CURE kag ang management nga tumanon ang kaundan sang CBA.
Apang suno kay Montaner, luyag nila sang commitment kag pat-ud nga petsa kun san-o tumanon ang CBA.
Suno sa presidente sang unyon, kuntani mahatag ang mga benepisyo bisan staggered lamang ukon amat-amat bangud nakaintindi ang mga empleyado nga may COVID pandemic kag may naglabay nga bagyo tinalikdan nga bulan.
Una nga ginaayo sang CURE amo ang signing bonus nga P15, 000 samtang ang differential naman suno kay Montaner ang sarang lang maamat-amat lakip sa ila nga sweldo.
Suno kay Montaner, tinutuyo sang pagfile sang notice of strike nga may mapatunga nga third party sa CENECO management kag unyon sa cooling period ukon pito ka adlaw pagkatapos sang strike vote subong nga Enero 29.
