Wala nagpangduha-duha ang 19 anyos nga bata nga lalaki nga salbaron ang amay sang abyan sini gikan sa sunog nga nagluntad sa Regent Pearl DC3 Subdivision, Brgy. Alijis, Bacolod City kagab-i.
Sa interview sang Bombo Radyo Bacolod kay AJ Doquino, nagluntad ang sunog mga alas 6:00 kagab-i kag nakita sini nga dako na ang kalayo.
Suno kay Doquino, ginabilin sang iya abyan sa iya ang yabi sang balay agud nga may magdul-ong sang pamahaw sa amay sini bangud gab-i na ini nagapauli halin sa trabaho.
Dugang pa sini nga ang amay sang iya abyan ang indi na makahulag bangud makaduha na ka beses nga gin-atake sang stroke.
Suno diri bangud sa nakita niya nga dako na ang kalayo madasig sini nga ginbuksan ang nagakasunog nga balay agud nga masalbar ang amay sang iya abyan.
Sang nakita sini ang amay sang iya abyan nagasinggit na ini sang kasakit bangud nalab-ot na sang kalayo ang bilog sini nga likod.
Gilayon man nga nagtawag sang bulig ang mga kaingod sang nasunugan kag wala man nalab-utan sang lima ka minutos nag-abot man ang bombero kag ang ambulansya.
Gindala na sa ospital ang biktima agud nga madapatan sang pagbulong ang nalapnos sini nga likod.
Ginalantaw ni Doquino nga ang kuryente sa kusina sang iya abyan ang ginhalinan sang sunog kagab-i.
Wala naman sang iban nga balay ang nadalahig sa sunog.
