Tuman ang kalipay sang mga tagdaog sang Swerte sa Palengke Promo 2024 sang Bombo Radyo kag Star FM kaina sa pagbaton sang ila premyo.
Suno sa 1st prize winner nga si Russel Pacto sang Para 1, Taloc, Bago City, ang P5000 cash prize nga iya nabaton, ang iya gamiton para ipang-allowance kag dugang nga budget para sa sulod sang balay.
Si Pacto ang nagdaog gamit ang proof of purchase nga R. Florete Pawnshop and Jewelry.
Para naman sa kinahanglan sang one week old baby girl ang P4,000 cash prize nga nabaton sang 2nd prize winner.
Suno sa tagdaog nga si Helton Calas sang 2nd Rd, Alunan ext. Bacolod City nga naggamit sang proof of purchase nga R. Florete Pawnshop and Jewelry, igabakal sini sang gocery kag kinahanglanon sang iya bata ang kwarta nga nabaton.
Samtang, wala naman nagpaulihi kag timprano pa nga nagpadulong sa estasyon para magbaton sang iya premyo ang 3rd prize winner.
Suno kay Norelyn Aparre sang Purok San Roque 1, Phase 6B, Brgy Handumanan, Bacolod City, tuman ang iya kalipay nga nabatian ang iya pangamuyo nga magdaog.
Gamit ang proof of purchase nga Whitfield Ointment, siya ang nagdaog kag nagbaton sang P3,000.
Suno diri, ang kwarta nga iya nabaton ang iya ibakal sang sud-an, bugas, kag allowance sang mga bata sini.
Samtang, nagpauli naman sang P1,000 cash prize kada isa ang tatlo ka mga weekly consolation prize winner sang Swerte sa Palengke Promo 2024 sang Bombo Radyo kag Star FM.
Suno sa tagdaog nga si Rosana Hilare sang Purok Greenfield, Brgy Tangub, Bacolod City nga naggamit sang proof of purchase nga Surf Powder, ang iya premyo ang iya gamiton para ibakal sang bugas, sud-an kag pabalon sa iya apat ka bata nga naga-eskwela.
Plano naman nga gamiton pangbalon sang Grade 12 student ang premyo sini nga nabaton.
Suno kay Ivy Mulle sang Purok Malipayon, Brgy 35, Bacolod City nga naggamit sang proof of purchase nga Revicon Forte, ang premyo sini ang iya nga idugang sa iya balon kasubong man nga bulig sa balaklon sa sulod sang balay.
Samtang, para naman dugang nga ibakal sang bulong sang nagamasakit nga iloy ang premyo sang consolation prize winner nga si Amado Villaranda sang Purok Pag-asa, Brgy Alijis, Bacolod City nga naggamit sang proof of purchase nga Gardenia.
Suno diri, siya ang nagatrabaho bilang Job Order sa ciudad sang Bacolod kag naga-atipan man sa iloy sini nga may sakit.
