Mismo ang subang nga bata ang nagserbe nga complainant sa parricide nga kaso nga ginpasaka batok sa amay nga nagtadtad sang labo sa iya apat ka tuig nga agot nga bata sa Purok Lucay 2, Barangay Camingawan, Kabankalan City, sang Desyembre 22.
Madumduman nga bag-o lamang tapos sang panyaga ang amay nga si Chalier Laurente, 48 anyos, laborer, upod ang tatlo sini ka kabataan nga mga naga-edad 23 anyos, 12 anyos kag ang agot nga apat ka tuig nga bata.
Sang magsulod sa kwarto ang kamagulangan, nahibaluan nga ginlock sang amay ang piertahan sang ila balay kag nagkuha sang binangon.
Nabatian na lamang sang subang nga bata ang paghinibi sang iya manghod gani siya ang naggwa kag napaslawan naman ini nga maagaw ang binangon sang amay.
Ang 12 anyos ang naglumpat naman sa bintana agud makagwa gani ang apat ka tuig nga bata na lamang ang gintadtad sini sang labo.
Ginpahayag sang mga kabataan nga antes sini ginhimo ang krimen, nagpahayag pa ang amay nga “balunon ta kamo”.
Sa pihak nga bahin, nahibaluan nga duha ka tuig ang nakaligad, ginmartilyo man sini ang ulo sang iya nga asawa tubtob sa napatay bangod sa selos.
Sa interview sang Bombo Radyo Bacolod kay Police Captain Joelan Vinson, deputy chief sa Kabankalan City Police Station, nafile na nila ang kaso sang Desyembre 26 kun sa diin ang complainant ang iya mismo subang nga bata.
Paathag sini nga nadetain man sang 2021 ang amay sang ginpatay sini ang iya asawa apang gindismiss sang Regional Trial Court Branch 61 Kabankalan City bangod wala nakapakita sa korte ang complainant.
Nahibaluan nga sa tatlo ka consecutive hearing nga indi nakatambong ang complainant, ang korte ang magapagwa na sang order nga provisionally dismissed ang kaso.
Bangod sini wala naman sang mahimo ang Kabankalan City Police Station kundi pagwaon ang suspensado bangod mando sang korte.
Panugyan sini sa karun nga complainant nga ipadayun ang kaso kag magtambong sa hearing agud indi na maliwat ang hitabo.
Paathag ni Vinson nga non-bailable ukon wala pyansa sa kaso nga parricide.
Aminado naman ini nga may posibilidad nga may psychological problem ang biktima bangod ini ang kaangay nga nagahallucinate kag nagapahayag nga may-ara sang mapatay sa iya.
Apang naumpawan naman ini kag naghilibion samtang yara sa prisuhan, nga kaangay nga ginhinulsulan gid sini ang iya nahimo.
Ginseparar man ini sang silda sa iban pa nga mga priso.
