Ginatinguhaan pa nga macontact sang Himamaylan City Police Station si Emily Fausto, ang subang sang pamilya nga ginmassacre sa Sitio Kangkiling, Brgy. Buenavista, Himamaylan City, Negros Occidental sang Hunyo 14.
Sa interview sang Bombo Radyo Bacolod kay Police Captain Arturo Margallo, deputy chief of Police sa Himamaylan City Police Station, ang mga witnesses lamang ang yara sa ila nga kostudiya samtang si Emily, nga una naman nga naghalin gikan sa iya balay sa Barangay Aguisan, Himamaylan City, ang nagpahayag nga magapadulong sa ila nga himata para sa iya nga safety.
Apang kasunod sini, sila ang nadulaan na sang contact kay Emily kag sa karun ang kapulisan ang nagapakig-angot man sa mga himata sini agud matumod kun sa diin nagpanago ang subang sang mga biktima.
Madumduman nga mga ginikanan sini nga sanday Imelda kag Rolly Fausto kaupod sa manghod nga sanday Ben, 15 anyos kag Raben, 11 anyos ang ginpaarakan sang luthang samtang yara sa ila nga balay sang mga armado nga suspetsado.
Suno kay Margallo, nakafile na sang affidavit of complaint ang mga witnesses, apang si Emily ang ginadihon naman sang kapulisan nga magfile sang affidavit bilang derekta nga pamilya sang mga biktima.
Apang paathag sini nga apisar nga indi makafile sang affidavit si Emily, ini ang sarang man nga mabuhat sang iban pa nga himata, kapulisan ukon bisan sin-o nga willing magfile bangod ang krimen ang ginakonsiderar nga “crime against person”.
Nahibaluan nga ang bana ni Emily ang bata sang aktibo nga mga miyembro sang Central Negros 2 sang New People’s Army (NPA).
Ginapangabay na lamang ni Margallo nga yara sa maayo nga kahimtangan si Emily kag ini ang makig-angot sa ila agud magfile sang affidavit of complaint, bangod parehas man ang mga ini nga nagatuyo nga maangkon ang hustisya para sa kamatayon sang apat ka biktima.
