Wala pa napasakaan sang kaso ang subject person sa ginpatigayon nga drug buybust operation sa atubang sang lodging house sa Alijis Road, Brgy Singcang Airport, Bacolod City nga nagluthang-patay sa isa ka police sang Hwebes sang gab-i.
Ang police nga napatay ang ginkilala kay Police Master Sergeant Romulo Galvez, miyembro sang Station Drug Enforcement Team (SDET) sang Bacolod Police Station 9.
Sa interview sang Bombo Radyo Bacolod kay Bacolod City Police Office Spokesperson Dax Santillan, ginapreparar pa sang mga kapulisan ang formal complaint batok sa suspetsado kag ginalantaw nga subong nga adlaw mapasaka na ang criminal case batok diri.
Suno kay Santillan, ang mga kaso nga pangatubangon sang suspetsado ang paglapas sa RA 9165 ukon Comprehensive Dangerous Drugs Act of 2002 bangud subject ini sa drug buybust operation kag lantawon kun mahimo pa mahulog sa kaso nga murder bangud napatay ang police.
Suno diri, padayon pa ang ila pagtipon sang dugang nga ebidensya agud nga mas mabakod pa ang kaso nga ipasaka batok sa suspetsado.
Dugang pa sini, nakibot sila nga ang suspek ang indi lang first time offender bangud naman ini sang nahimo nga krimen nga recorded sa Police Station.
Ini ang ginalakipan sang robbery, pagpang-abusar kag physical injuries.
Ginakasubo sang BCPO ang kamatayon ni Galvez.
Suno kay Santillan si Galvez ang maayo nga police kag madamo man sang pasidungog nga nabaton kag bisan diin man ini idestino nagatrabaho ini sang maayo.
