Patay ang subject sa buybust operation nga ginpatigayon sang Bacolod City Drugs Enforcement Unit (CDEU) matapos gina-alegar magbato sa mga pulis sa Florenceville Subdivision, Barangay Pahanocoy ciudad sang Bacolod kagab-i.
Ginkilala ang subject person kay Jose Paterio Torete 43-anyos kag residente sang Rosario Heights, Barangay Taculing santo sa ID card nga nakuha sang mga otoridad.
Sa interview sang Bombo Radyo Bacolod kay P/Capt. Leo Estopa, head sang CDEU kag station commander sang Bacolod Police Station 2, namutikan ni Torete nga pulis ang ka-transaksyon sini gani gilayon siya nga nagkuha sang armas kag nagpalupok sa operatiba.
Maswerte naman suno kay Estopa nga wala naigo ang pulis kag nakahingagaw ini balos nga gintunaan sang pagkaigo sang bala sa suspetsado rason sang iya gilayon nga kamatayon.
Magluwas diri, nadakpan pa ang pito ka mga lalaki nga nagapatigayon sang pot session sa pihak nga kwarto samtang isa naman ka lalaki ang nakapalagyo.
Nagadangat sa 55 gramos sang iligal nga druga ang ila nakuha nga nagabalor sang 374 mil pesos.
Suno kay Estopa, posible nga ginahingagaw nila distribute ang mga iligal nga druga sa ciudad sang Bacolod antes ang four-day lockdown nga patigayunon sugod subong nga adlaw.
Samtang, suno naman sa tag-iya sang apartment nga ginpatigayon sang operasyon, Mayo 31 sang nagsugod renta sa isa ka unit si alyas Joy upod ang live-in partner sini, duha ka mga babayi kag isa ka agi.
Dugang pa sang tag-iya nga nagpakilala sa iya sanday alyas Joy nga naga-buy and sell sang salakyan.
Ginrentahan man sang mga ini ang isa pa gid ka kwarto para sa mga gina-alegar mekaniko nila.
Sa karon, padayon pa ang follow up operation sang kapulisan agud madakpan ang isa ka atlarge.
