Tubtob nalang sa Martes, Disyembre 8, ang submission sang mga barangay sang listahan sang mga pangalan nga apektado sang granular lockdown agud makakuha sang bulig pinansyal ang mga pamilya nga apektado.
Sa interview sang Bombo Radyo Bacolod kay Department of Social Services and Development (DSSD) head Pacita Tero, ginpahayag sini nga apisar holiday, I-entertain nila sa gihapon ang pagpapasa sang listahan sa ila nga opisina ukon paagi sa email nga dssdbac@gmail.com.
Ini agud nga ila mapasulod sa session sang Sangguniang Panlungsod sang Bacolod pagka-Miyerkules agud nga mahimuan sang resolusyon nga inugpasa naman sa Department of the Interior and Local Government (DILG) agud aprubahan.
Madumduman nga ang mga apektado nga nalakip sa high income families ang madisqualify santo sa pagsulundan sang Department of Social Welfare and Development (DSWD) apang ang mga nakapalibot nga balay nga naapektuhan sang granular lockdown nga low income bisan wala sang nagpositibo sa pamilya ang sarang makabaton sang cash grant sa idalom sang Bayanihan 2 ukon Bayanihan to Recover As One Act.
Ang mga SAP beneficiaries ang sarang nga maka-avail sang one time nga P6000 sa idalom sang Bayanihan 2 kun sila ang naapektuhan sang granular lockdown.
Tinguhaan man nila nga marelease ang payroll antes ang Disyembre 19 kadungan sang expiration sang Bayanihan 2.
