Naserbe na ang subpoena kay Police Staff Sergeant Enrique Gonzalodo para sa administrative case sa pagpatay sini kay Kristine Joy Dignadice.
Suno kay Atty. Owen De Luna, regional director sang National Police Commission-Negros Island Region, naserbe na ang subpoena kay Gonzalodo kag ginhatagan ini sang lima ka adlaw para magsabat.
Suno diri, yara na kay Gonzalodo kun sabton sini ang subpoena nga may yara sang counsel ukon wala.
Suno pa diri, ang central office nagaconduct sang imbestigasyon samtang nagabulig man ang iban nga units sa pag-imbestigar naman sa criminal case.
Sa bahin sang criminal case batok kay Gonzalodo, nafile na ang kaso sini nga murder apang sa ginhimo naman nga extra judicial confession sang pulis, indi pa diri makasulod ang NAPOLCOM bangod hulaton anay nila ang sabat sini sa subpoena.
Apang, kun luyag man ni Gonzalodo nga bawion ang iya confession, iya pa ini mahimo bangod indi pa man ini magamit batok sa iya.
Madumduman nga accidental firing ang rason ni Gonzalodo sa pagkapatay ni Dignadice.
Samtang, nagapanawagan naman si De Luna sa kun sin-o pa ang may nahibaloan sa kaso nga magpalapit lamang sa mga otoridad.
