Nagdangop sa Ipa-Bombo Ta Segment sang Bombo Radyo ang isa ka trabahador sang tubo sa Barangay Gomez, Pontevedra matapos wala madala sa listahan sa mga makabaton sang kapin P10,000 nga financial assistance gikan sa DSWD bangud sa halit sang Red-Striped Soft-Scale Insect (RSSI).
Sa interview sang Bombo Radyo kay Desiree Trafanco, tagreklamo, siya ang madugay na nga nagatrabaho sa kampo nga ginapanag-iyahan sang iya amay.
Siya ang nagpasa sang kompleto nga requirements sa ila barangay upod ang apat niya ka mga kaupdanan nga trabahador man sa kampo sang iya amay.
Sang tinalikdan nga Martes, nag-abot na ang listahan sa makabaton sang nasambit nga financial assitance.
Ginkatingala sini bangud yara sa listahan ang apat niya kaupdanan apang ang iya pangalan ang wala nadala.
Suno kay Trafanco, 270 ka mga benepisyaryo ang yara sa listahan samtang 32 naman ang wala nadala.
Ginpamangkot niya ang barangay secretary apang sabat sini nga dapat isa lang ka benepisyaryo sa isa ka pamilya ang makabaton sang ayuda.
Apang ginkasubo sini nga madamo siya sang kakilala nga wala man gani nagatrabaho sa kampo apang nadala sa listahan sa mga benepisyaryo.
Subong nga adlaw ang hatagay sang ayuda sa tatlo ka mga baragay sa banwa sang Pontevedra nga ginlakipan sang Brgy Mabini, Burgos kag Gomez.
Nanawagan si Tranfanco sa DSWD NIR kag Local Goverment Unit nga masabat ang iya pamangkot kun ngaa wala ang iya pangalan sa listahan sang mga benepisyaryo.
