Nagapanawagan ang grupo sang sugar farmers sa probinsya sang Negros Occidental nga mapasakaan man ang ila nga sweldo kag mahatagan man sila sang konkreto nga pangabuhian.
Sa interview sang Bombo Radyo Bacolod kay Mario Tapi-on, Spokesperson, National Federation Of Sugar Workers, nagapamatok ang mga ini sa importasyon sang kalamay bangud nagaapekto man sa ila nga mga mangunguma.
Suno kay Tapi-on, kun wala na maayo nga kita ang mga magagmay nga planters nga gintrabahuan nila, ibaligya naman nila ang ila mga duta, madulaan naman sila sang trabaho.
Ginalantaw man ni Tapi-on, nga nagmahal na ang presyo sang kalamay indi bangud sa kakulang sang stock kundi sa pagtago sang mga traders.
Ginpahayag man sini nga sobra-sobra man ang ginahimo sang mga traders bangud ang gate price sang isa ka sako nga kalamay ang P1500 apang kun baklon sa merkado nagadangat na ini sa masobra P2000.
Nagapanawagan man ini kay Negros Occidental provincial governor Eugenio Jose Lacson nga pangitaan sang paagi nga sila ang may permanente nga pangabuhian kag mapataasan man ang ila nga sweldo.
